Lalín (Pontevedra), 5 de abril de 2025
O secretario xeral da Lingua, Valentín García, participou hoxe na descuberta dunha placa conmemorativa dedicada a VIctorino Gutiérrez Aller nunha homenaxe que o Concello de Lalín lle rende así ao notario cofundador da Irmandade Xurídica Galega.
No acto, o representante da Xunta destacou da súa figura “o seu gran papel como dinamizador da lingua galega nun ámbito tan específico como é o xurídico” e todo un exemplo, dixo, «de como integrar o noso idioma e incentivar o seu uso en todos os ámbitos e sectores profesionais”. Así, lembrou que precisamente nestes momentos o Goberno galego está a acometer un gran plan que abrangue moi diversos eidos, con medidas para prestixiar o galego como lingua habitual en espazos concretos que van desde a Xustiza e a Administración, ata a Educación ou a Sanidade.
Valentín García agradeceu o esforzo tamén das distintas entidades que traballan en prol da galego como o caso da propia Irmandade Xurídica Galega que “promove o seu uso como lingua de traballo”. É por iso que fixo fincapé na apertura do Pacto pola Lingua impulsado desde a Consellería de Cultura, Lingua e Xuventude, á participación de moi diferentes institucións, asociacións e colectivos “cuxas achegas consideramos esenciais para chegar ao mellor marco posible para o galego”.