Santiago de Compostela
Santiago, mércores 19 de marzo de 2025. Un grupo de traballo constituído por representantes universitarios e da administración autonómica planificarán a partir do vindeiro mes de maio a ampliación da docencia clínica do grao en Medicina impartida nos hospitais clínicos universitarios do Sergas, nomeadamente nos da Coruña e Vigo, a partir do curso 26/27.
Esta é unha das conclusións da xuntanza celebrada este mércores entre o reitor da USC Antonio López; o decano da Facultade de Medicina, Julián Álvarez Escudero; e os conselleiros de Sanidade e de Educación, Antonio Gómez Caamaño e Román Rodríguez, respetivamente. “Traballamos cunhas premisas que todos compartimos e que están na base do convenio asinado en 2015: hai unha única Facultade de Medicina en Galicia, a de Santiago de Compostela, responsable do grao en Medicina que imparte a USC” indicou o reitor ao termo da xuntanza na que se anunciou a intención de constituír o grupo que traballará na optimización do proceso docente da parte clínica en Medicina.
Como lembrou, “a responsabilidade docente e académica da formación en Medicina vai depender sempre da Facultade de Medicina e dos departamentos adscritos á Facultade da USC”, engadiu López. Na súa opinión o fin último de todo este proceso debe ser o de xuntar o esforzo e a capacidade do Servizo Galego de Saúde co labor desenvolvido na Facultade de Medicina da USC. Así dixo que “temos que ser quen de aproveitar todas as oportunidades do sistema sanitario galego para a formación do noso estudantado” e subliñou como fundamental “que os futuros profesionais da medicina sexan formados por profesionais desta área. Temos que aproveitar as capacidades dos sistema sanitario para darlle a maior e a mellor formación clínica ao noso estudantado”.
A Xunta e a USC coinciden na necesidade de avanzar no desenvolvemento do acordo para a impartición da docencia clínica de Medicina asinado no ano 2015 coas universidades da Coruña e de Vigo co obxectivo de aproveitar ao máximo as capacidades do sistema sanitario galego e a ofrecer a mellor formación ao alumnado de Medicina. Na xuntanza desta mañá, acordaron tamén dar os pasos necesarios, de xeito dialogado con todos os axentes implicados, para avanzar cara a un modelo de optimización da docencia clínica de Medicina que se desenvolverá de xeito transparente, ordenado e consensuado.