Santiago de Compostela, 2 de abril de 2025
O conselleiro de Educación, Ciencia, Universidades e Formación Profesional, Román Rodríguez, participou hoxe na apertura da 15ª Xornada: Equipos directivos, clave na mellora educativa, organizada pola Asociación de Directores e Directivos de IES de Galicia (ADDIGA). Acompañado polo director xeral de Centros e Recursos Humanos, Jesús Álvarez, o conselleiro agradeceu o traballo “esencial” que os equipos directivos desempeñan para o bo funcionamento do ensino galego.
No encontro, que reúne en Santiago a medio cento de persoas, o titular de Educación da Xunta expresou os parabéns ás persoas que exercen funcións directivas nos colexios e institutos polo seu compromiso coa formación e a actualización continua, que resulta fundamental “nun contexto cada vez máis cambiante e esixente”. Neste senso, tamén aproveitou para amosar o apoio da Administración autonómica a través de iniciativas concretas xa en marcha como a redución da burocracia nos centros ou as melloras de complementos específicos por funcións directivas, titorías ou formación permanente.