Lugo
Un total de 16 centros de Ensino Medio participan esta semana nos Encontros na Zona USC que se desenvolven no Campus de Lugo. Preto dun milleiro de estudantes percorren este martes 25 e o mércores 26 a sede universitaria luguesa a través de sete itinerarios diferentes de acordo coas preferencias de cada estudante e que permiten que a mocidade preuniversitaria coñeza de primeira man a oferta docente e de servizos do Campus de Lugo.
Deste xeito, os Encontros na Zona USC volven ser punto de achegamento para estudantes de Ensino Medio de toda Galicia este mes de febreiro. Estas xuntanzas aproximan o estudantado preuniversitario ás facultades, escolas e servizos da USC, alén de ofrecerlle a oportunidade de recibir información sobre a oferta de estudos de grao. Cada estudante elixe un percorrido en función das súas preferencias iniciais. Así, poden visitar aulas, laboratorios e outros espazos dos centros nos que se imparten os graos da súa preferencia.
Os Encontros nacen no marco do Programa A Ponte entre o Ensino Medio e a USC que leva en funcionamento dunha forma estruturada desde o curso 2003-04 e, ademais de dar a coñecer os estudos de grao, achega información sobre o contexto investigador, social, cultural e espacial da USC.