O profesor Justo Arines asinou o pasado día 21 a súa praza como catedrático da Universidade de Santiago, converténdose así no primeiro catedrático da área de Optometría de Galicia.
A USC foi pioneira na formación de profesionais altamente cualificados no ámbito da saúde visual en España ofertando a Diplomatura en Óptica e Optometría que posteriormente evolucionou cara o Grao en Óptica e Optometría actual. Este programa ten como obxectivo formar expertos capaces de atender as crecentes necesidades da sociedade no coidado da visión, desenvolvendo competencias esenciais na prevención, detección, avaliación e tratamento de alteracións visuais.
A designación do profesor Arines como catedrático subliña o firme compromiso da Universidade de Santiago de Compostela coa excelencia académica e co fortalecemento da óptica e optometría como disciplina clave na atención visual primaria, formando futuros ópticos-optometristas capaces de responder de maneira eficaz ás crecentes demandas da poboación.