Santiago de Compostela
Unha mostra expositiva e a plantación dun érbedo no xardín de Fonseca escenificarán este mes de abril o “ingreso simbólico, con honores” de Rosalía de Castro no claustro da USC, nunha iniciativa da cátedra homónima dedicada á autora galega e “mestra literaria”. Estas dúas propostas exploran as inquedanzas da escritora e a súa “participación das ideas xeradas dende a Universidade, incluídas as científicas e, máis especificamente, as botánicas”, explica a co directora da Cátedra, a profesora María do Cebreiro Rábade Villar.
Mostra
Da man do Museo de Historia Natural da USC e co financiamento da Fundación BBVA, ‘Rosalía e Fonseca’ é un achegamento ás inquedanzas científicas da autora, quen aínda que non puido cursar estudos universitarios tivo oportunidade de acceder á instrución musical, dramática, literaria e pictórica recibida como froito da súa vinculación aos círculos progresistas do Liceo de la Juventud.
Así, a partir do 9 de abril e durante todo o mes de maio, no claustro alto do Colexio de Fonseca, unha mostra mergúllase nesta faceta, que porá en conexión a obra da autora cos discursos científicos do seu tempo, por exemplo, no ámbito botánico. Para abordar este relación a mostra artéllase arredor de dous eixos: Rosalía como coñecedora dos saberes literarios e científicos do seu tempo e Rosalía como obxecto de estudo dos proxectos de investigación desenvolvidos nos últimos anos desde a USC. Así a exposición conta con catro bloques temáticos diferenciados: ‘Os ollos das árbores’, ‘A primeira poeta ecoloxista de Europa’, ‘Rosalía global’ e ‘Sola se queda Fonseca: da estudiantina decimonónica ao estudantado do IES Rosalía de Castro’.
Para o seu desenvolvemento este proxecto conta coa colaboración de entidades donantes como o Museo Valle-Inclán ou a Fundación Rosalía de Castro. Ademais e dado que se trata dunha actividade de diálogo entre humanidades e ciencias experimentais, tamén participan activamente no seu desenvolvemento as facultades de Química, Física e Bioloxía
Érbedo
Coincidindo co Día Mundial do Libro, a Cátedra Rosalía de Castro organizará o 23 de abril a plantación dun érbedo no xardín de Fonseca, nunha actividade concibida en colaboración co Concello de Santiago que procura honrar a memoria rosaliana. Como explica a profesora Rábade Villar, é sabido que a escritora gustaba de escribir onda un exemplar desa mesma especie, sito no Pazo de Lestrobe, que foi talado no século XX, polo que, na súa opinión, “a plantación sería, asemade, un acto de restitución simbólica do devezo de Rosalía pola natureza”.
Nesa mesma xornada está prevista a doazón á Biblioteca Universitaria dun exemplar do libro-herbario Os ollos das árbores, froito dunha axuda Leonardo da Fundación BBVA, así como de dous exemplares do mesmo libro, con ilustracións botánicas dos artistas Cristina Lucas e Fernando Sánchez Castillo, ao Museo de Historia Natural da Universidade.