Santiago de Compostela, 4 de marzo de 2025
O Diario Oficial de Galicia (DOG) publica hoxe o decreto que establece o pago dunha axuda ás persoas que perciben unha prestación non contributiva. A Xunta destina 8 millóns de euros a ingresar de oficio un complemento extra de 218 euros ao redor de 36.500 persoas beneficiarias de pensións de xubilación e invalidez nas súas modalidades non contributivas e as do subsidio de garantía de ingresos mínimos.
Trátase dun único pago anual que os beneficiarios reciben de maneira automática nas súas contas bancarias, sen necesidade de que o soliciten nin que fagan trámite algún. Soamente deberán cumprir dous requisitos: ter residencia habitual en Galicia e estar en situación de alta en nómina na data 1 de xaneiro de 2025.
Galicia é unha das poucas Comunidades Autónomas que concede de xeito ininterrompido desde o ano 2008 esta axuda extraordinaria que non é obrigatoria, pois son os propios gobernos rexionais os que deciden mantela. Ademais, se mantén o adiantamento do pago, tal e como se fai desde 2023, xa que anteriormente estas axudas se ingresaban a finais de cada ano.