O catedrático da USC e investigador principal do Centro de Investigación en Química Biolóxica e Materiais Moleculares (CiQUS), José Luis Mascareñas, ingresa na Real Academia de Ciencias Exactas, Físicas e Naturais (RAC) como académico de número. A decisión tomouna o pleno da Academia o pasado 26 de marzo, no que tamén nomearon Manuel Andrés Rodrigo Rodrigo (Universidade de Castela-A Mancha) e o paleontólogo arxentino Luis Chiappe.
Mascareñas, que se incorpora á sección de Físicas e Químicas da RAC, lidera no CiQUS (centro que dirixía ata hai unhas semanas) un proxecto do Consello Europeo de Innovación para desenvolver un novo axente anticancro. Para o profesor da USC é “un privilexio e unha honra” formar parte do “selecto grupo de académicos numerarios e, ao tempo, unha gran responsabilidade”. A Academia, segundo as súas palabras, “ten sido o fogar de figuras como José Echegaray ou Margarita Salas, así como de galegos ilustres como Parga Pondal. Ademais, terei a honra de compartir espazo con académicos amplamente recoñecidos internacionalmente, como Luis Liz-Marzán, Nazario Martín ou o recentemente galardoado co premio Fronteras del Conocimiento, Avelino Corma”.
José Luis Mascareñas convértese así no primeiro académico de número da Universidade de Santiago na RAC, que conta con dous membros correspondentes, os matemáticos Alfredo Bermúdez de Castro e Wenceslao González Manteiga.