Lugo, 28 de febreiro de 2025
O delegado territorial da Xunta, Javier Arias, participou hoxe nos actos organizados en Lugo pola Federación Galega de Enfermidades Raras e Crónicas (Fegerec) para conmemorar o día mundial destas doenzas, asistindo tanto á lectura da declaración institucional como á andaina polo adarve da Muralla.
Arias lembrou que o Goberno galego apoiou a programación que a Federación veu desenvolvendo durante o último mes, que culminou nesta xornada que tamén incluíu unha mesa redonda no Hula. Ademais, a fachada da sede da Delegación Territorial estivo esta noite iluminada de cor verde.
O delegado insistiu na necesidade de dar visibilidade a estas doenzas e prestarlles atención especializada. Para elo, afirmou, a Xunta puxo en marcha a Estratexia galega de enfermidades raras, que permite facer un seguimento do paciente desde que entra no sistema sanitario ata que dispón do tratamento axeitado.