A Universidade de Santiago lidera o proxecto ERASMUS + Building Capacities for a Transition to a Circular Economy (CEBCAT) de transferencia de coñecementos e capacidades de formación coa fin de preparar profesionais en materia de sustentabilidade e circularidade nas universidades asiáticas.
O proxecto, coordinado polo profesor Óscar Rodil, está comezando estes días a súa andaina na Facultade de Ciencias Económicas e Empresariais e no Centro de Estudos Avanzado, coa participación de representantes das 11 institucións socias de Luxemburgo, Grecia, Romanía, Laos, Indonesia, Vietnam e España.
CEBCAT elaborará un curso de posgrao adaptado a estudantado recén graduado e profesionais que abarcará cuestións medioambientais, sustentables e de economía circular en varios sectores. As persoas que o cursen obterán información sobre propostas de economía circular e aprenderán métodos prácticos para proxectos de sustentabilidade dentro dos seus ámbitos.
Tal e como explica o profesor Rodil, a necesidade de cooperación “xorde da necesidade de progreso nas medidas de sustentabilidade da rexión obxectivo e do esforzo da UE en materia de cooperación internacional e transferencia de coñecemento no deseño de programas formativos para aplicar medidas de transición enerxética e de circularidade”.