Lugo
O acto institucional co que a Facultade de Administración e Dirección de Empresas do Campus de Lugo conmemorou este xoves 3 a súa festividade serviu, en palabras do seu decano, Roberto Bande, para “reivindicarnos como facultade, e para recordar que pertencemos a unha comunidade académica comprometida coa formación do noso estudantado, a investigación do máis alto nivel e a transferencia do coñecemento que aquí se xera cara á sociedade e o tecido produtivo da nosa contorna”. A sesión estivo presidida polo vicerreitor de Organización Académica e Campus de Lugo, Francisco Fraga, e serviu de marco para homenaxear persoal xubilado da Facultade e facer entrega de diversos galardóns ao estudantado do centro.
O vicerreitor subliñou na súa intervención que “todos os centros son importantes no Campus de Lugo e que debemos xogar todos xuntos para lograr que o campus medre”. Francisco Fraga puxo de relevo que ADE é “un centro referente á hora de organizar foros” que profundan nun amplo abano de temáticas e realizou un chamamento á participación do estudantado xa que a formación non é só coñecemento adquirido nas aulas senón tamén outro tipo de destrezas de carácter transversal. O horizonte de posibilidades que debullan as microcredenciais, a alianza EUniWell ou o futuro centro de investigación asentado sobre o enfoque One Health, que terá sede no campus lugués, foron outras das cuestións abordadas polo vicerreitor, quen lembrou que nese futuro espazo de investigación tamén haberá oco para as liñas que se desenvolven en ADE.
Oferta docente
“Despois de moitos anos dende a súa constitución como facultade, podemos afirmar que o noso centro goza de moi boa saúde”, sinalou Roberto Bande no seu discurso ante a comunidade universitaria do centro. “Temos dous títulos de grao plenamente consolidados na oferta académica do campus, cubrindo a totalidade das prazas ofertadas, e cunha nota de corte que vai subindo curso a curso. O mestrado universitario en Dirección de Empresas continúa captando estudantado, maioritariamente de orixe internacional, polo que a nosa oferta formativa goza dun amplo respaldo en termos de demanda social”, engadiu.
O decano tamén puxo o foco na docencia de calidade como outro dos trazos distintivos do centro que dirixe pero sen perder de vista desafíos como a internacionalización e a ancoraxe da excelencia investigadora. “Hai moitas oportunidades por explotar e son moitas as fortalezas que temos como centro. Estou seguro de que seremos capaces de aproveitar este contexto para seguir medrando”, dixo. Roberto Bande tamén quixo ter un “emocionado recordo” cara aos profesores recentemente finados, Luis Gago e Máximo Salinas, “un bo exemplo do compromiso coa docencia universitaria”. “A memoria destes magníficos compañeiros, xunto a outros como Víctor Peinó, Carlos Insúa, Bernardo Cendán ou Santiago Buide segue e seguirá viva nesta facultade”, subliñou.
Homenaxe e premios
O acto serviu para render tributo ás figuras de Sindo Villar Casas, Rosa Varela Puga e Manuel Vilas Fernández, profesorado xubilado do centro, así como para facer entrega do recoñecemento ao mellor expediente académico nos graos de Administración e Dirección de Empresas e de Empresa e Tecnoloxía no curso 2023/2024, que recaeu en Dariel Pardo Veitía e Sara Domínguez Torres, respectivamente.
Ademais, na mañá do 2 de abril disputouse o I Torneo ADE-USC de baloncesto 3×3. O conmemoración de San Vicente Ferrer, patrón de ADE, serviu tamén para facer entrega dos premios desta competición ao equipo vencedor, denominado Lakers in 5 e integrado por Pablo Collado, Mario Fernández, Santiago Laya e Martín López. En segundo lugar quedou o equipo Emprendunks, formado por Manuel Álvarez, Agustín Banda, Enrique Imán e Pedro Varela. O concurso de triplas gañouno Manuel Álvarez, en segundo lugar quedou Santiago Laya e empatados no terceiro posto Martín López e Pedro Varela.
