Un total de 148 prazas no Campus de Santiago e outras 64 no de Lugo conforman a oferta do programa de Titores 24/25, dirixido a estudantado de grao. As persoas interesadas, logo dun período formativo previo, participarán nas actividades de acollida ao estudantado de novo ingreso, exercendo de titores/as durante todo ano académico e colaborando nas actividades que organice o programa ‘A Ponte’. O prazo para a presentación de solicitudes xa está aberto e estenderase ata o próximo 24 de febreiro. A participación no programa está recoñecida con seis créditos.
O programa desenvolverase a o longo de dous cursos académicos: o primeiro será de carácter teórico e nel ofrecerase formación sobre coñecementos básicos do funcionamento da USC, achegando ás persoas inscritas as técnicas precisas para poder orientar ao estudantado de novo ingreso na USC. Xa no segundo curso, desenvolverase os labores propios de titoría e acompañamento de estudantes de novo ingreso colaborando, ademais, na difusión da USC nos centros de ensino medio de Galicia, nas visitas guiadas que alumnado de secundaria realizará ás instalacións universitarias e noutras iniciativas promovidas dende A Ponte.
O primeiro bloque teórico desenvolverase entre o 10 e o 27 de marzo, de luns a xoves en horario de 20.15 a 21.45 horas na Facultade de Dereito de Santiago e na de Administración e Dirección de Empresas de Lugo. Para poder participar, as persoas interesadas deberán ter superado un mínimo de 30 créditos nos estudos de graos nos que estean matriculados/as. Calquera dúbida ou consulta sobre esta consulta pode dirixirse ao correo electrónico aponte [at] usc.gal (aponte[at]usc[dot]gal).