Boiro (A Coruña), 2 de abril de 2025
O director xeral de Comercio e Consumo, Gabriel Alén, asistiu esta mañá á presentación do novo catálogo de premios do sistema de fidelización da Asociación Boiriense de Empresas (ABE) –na que tamén estivo presente o alcalde do municipio, José Ramón Romero— co que se pretende fomentar o consumo local, recompensar a confianza da clientela e manter o tecido empresarial activo. O sistema de fidelización —que conta co apoio da Xunta de Galicia— ten preto de 4.200 usuarios activos, 33.820 tickets rexistrados en 2024 , arredor de 9.000 no que vai de 2025 , e está aberto a todas as persoas que realicen compras nos máis de 200 negocios asociados.
Durante a súa intervención, o director xeral subliñou a importancia deste tipo de accións para o fortalecemento do comercio de proximidade, conectando aos consumidores cos negocios do seu territorio e contribuíndo á dinamización da economía local, sendo esta un aspecto fundamental para o crecemento e benestar da comunidade. Neste senso, Gabriel Alén lembrou que o pasado luns o Consello da Xunta aprobou o Plan Estratéxico do Comercio 2025-2030 —cun orzamento de máis de 320M€—, que tralo intenso proceso participativo de todos os axentes do sector recolle unha batería de ambiciosas medidas e máis de 70 accións específicas, para consolidar un sector forte, sostible, moderno e de calidade, atopándose entre elas a potenciación de experiencias de compra diferenciadas, como é no caso dos centros comerciais abertos, avanzando na súa profesionalización e rexistro e potenciando a excelencia das propostas.