As Neves (Pontevedra), 4 de abril de 2025
A directora xeral de Traballo Autónomo e Economía Social, Marta Mariño, asistiu esta mañá á xornada técnica Deporte e turismo activo nos montes da Paradanta e San Nomedio, organizada polo Polo de empredemento e apoio ao emprego do Porriño en colaboración co Concello de As Neves. Nesta actividade —na que tamén estivo presente o alcalde do municipio, José Manuel Alfonso— os participantes puideron explorar as oportunidades que ofrece o territorio, poñendo en valor os recursos naturais e os elementos patrimonais da zona a través de distintos axentes implicados, ao mesmo tempo que coñeceron experiencias reais de emprendedores xa consolidados coa oportunidade de crear sinerxías con eles.
Na súa intervención, Marta Mariño fixo fincapé no labor da Rede de polos de emprendemento e apoio ao emprego —iniciativa pública nada en xullo de 2022— que presta, de forma gratuíta e a través das súas 15 oficinas, asesoramento individualizado, tanto a quen desexa emprender na Comunidade como a quen xa o fixo e quere consolidarse. A Rede ten, ademais, un gran foco no rural, co obxectivo de dinamizar a economía local, fixar poboación e combater o reto demográfico. Neste marco, o Polo do Porriño, desde a súa creación no ano 2023 leva preto de 620 proxectos atendidos e máis de medio cento de actividades realizadas entre reunións con entidades, accións de formación e eventos da rede, resaltando que actualmente o número de mulleres emprendedoras atópase no 58 % sobre o total de persoas asesoradas.