Poio (Pontevedra), 5 de abril de 2025
A directora xeral de Promoción da Igualdade, María Quintiana, acompañada do secretario xeral de Emprego e Relacións Laborais, Pablo Fernández, participou na entrega da Premios Mulleres da Federación pola Igualdade das Mulleres de Pontevedra (Femupo), onde aproveitou para poñer en valor o traballo das galardoadas que nos permite seguir avanzando cara unha Galicia máis igualitaria.
A directora xeral fixo fincapé na importancia de seguir dando visibilidade aos referentes femininos en todas as esferas sociais. Deste xeito, Quintiana sinalou a necesidade de que as nenas e as adolescentes medren nun mundo onde as mulleres non teñan barreiras e poidan ser o que elas queiran ser. Así, fixo mención ás premiadas, todas elas destacadas en diferentes disciplinas como no deporte o Club de Balomnano Artai de Paio; na cultura, a directora do Conservatorio de Música de Pontevedra Manuel Quiroga, Paula Castro; na administración, o equipo de Policía Autonómica de Pontevedra; na empresa, a directora da Naviera Piratas de Nabia, María Jesús Otero Acuña; e no asociacionismo, a Asociación de Mulleres Rurais Mar e Agro de Bueu. De todas elas destacou as carreiras de fondo que levan percorrido en cada un dos sectores para, ao final, axudar a construír sociedades máis xustas, inclusivas e igualitarias para todas e para todos.
Ademais, María Quintiana explicou que é fundamental que a Administración autonómica e as entidades sociais vaian da man para seguir gañando dereitos e axudando a que Galicia siga avanzando en materia de igualdade de xénero. Neste sentido, enxalzou o traballo das federacións de mulleres rurais e todas as asociacións que as conformar por loitar e traballar de xeito incansable para seguir dando pasos adiante. Así, adiantou que desde a Xunta de Galicia seguirase traballando da man de todas estas entidades xa que é un das mellores fórmulas para chegar ás mulleres do rural.