A Teixeira (Ourense), 3 de abril de 2025
O xerente do Consorcio Galego de Servizos de Igualdade e Benestar, Perfecto Rodríguez, visitou esta mañá as obras da futura residencia municipal de maiores da Texeira, un centro ao que a Xunta destina 1,2M€ e que contará con 32 prazas. No percorrido polas instalacións, o xerente estivo acompañado polo alcalde, Xosé Vázquez Rodríguez.
Esta actuación forma parte do Plan de Investimentos de 18,5M€ acordado coa Federación Galega de Municipios e Provincias (Fegamp) e co que a Xunta financia unha vintena de proxectos de mellora, reforma ou construción de residencias e centros de día de titularidade municipal. O obxectivo deste Plan é dotar aos concellos máis rurais e con menor poboación de servizos de atención aos maiores. No caso da Texeira, o total da actuación será de 2M€, financiados en gran parte pola Xunta. Pola súa banda, a Deputación de Ourense investirá 500.000€ e o Concello achegará importe restante.
As obras inclúen a urbanización da contorna, para dotala dos servizos necesarios, e a construción da edificación nun único volume rectangular dunha planta. O acceso realizarase pola parte central, onde se instalará a zona de recepción e administración, ademais de dous aseos adaptados. Ese espazo comunicará coa zona de día, a área médica, a de persoal e, por último, a zona de noite, con 16 habitacións dobres, todas elas con baño independente.
Con esta actuación dotarase ao concello de 32 prazas residenciais para persoas maiores. Perfecto Rodríguez destacou que o Plan de Investimentos en centros de atención residencial e diúrna de titularidade municipal supón un impulso histórico da Xunta á rede galega de atención e coidado a maiores. Así mesmo, fixo fincapé en que o Executivo galego financiará parte das obras con fondos europeos Next Generation do Mecanismo de Recuperación e Resiliencia.