A USC proclamouse vencedora da clasificación xeral no marco da vixésimo sétima edición dos Campionatos Galegos Universitarios de Deportes Colectivos logo de acadar o primeiro posto en baloncesto, tanto masculino como feminino; en balonmán masculino; en fútbol sala masculino; e en voleibol, tanto masculino como feminino.
Ademais, a Universidade de Santiago de Compostela acadou o segundo chanzo en balonmán feminino; e o terceiro en fútbol, tanto masculino como feminino; fútbol sala feminino; e Rugbi 7, modalidades masculina e feminina. Na devandita clasificación xeral, a USC acadou un total de 25 puntos, seguida da Universidade de Vigo que obtivo o segundo posto con 24 puntos e a da UDC, que logrou o terceiro con 23 puntos.
A UDC foi a encargada de acoller as competicións dos deportes colectivos nos Campionatos Galegos Universitarios 2025, que se desenvolveron os días 12 e 13 de marzo. O evento, organizado de maneira rotatoria entre as tres universidades públicas galegas, conta co apoio da Secretaria Xeral para o Deporte. Nesta edición, acolléronse competicións de fútbol, rugby, baloncesto, fútbol sala, voleibol e balonmán, que reuniron un total de 492 deportistas, con paridade absoluta entre mulleres e homes (246 en cada categoría).
