En 2024, a Universidade de Santiago mantivo por quinto ano consecutivo unha tendencia crecente en canto a solicitudes de patentes rexistradas. Concretamente, e segundo os datos presentados este xoves polo director da Área de Valorización, Transferencia e Emprendemento da USC (AVTE), José Luis Villaverde, a USC contabilizou 24 patentes e outras 54 extensións internacionais, mellorando os rexistros de 2020, con 13 patentes e 35 extensións. Villaverde deu conta destes indicadores na apertura do seminario IP Perspectives Galicia que organiza a AVTE en colaboración coa firma especializada en propiedade industrial ABG Intellectual Property.
A USC leva dende o ano 1988 traballando na protección do seu coñecemento, e na la actualidade a carteira activa sitúase en torno ás 300 patentes. “O incremento experimentando de xeito sostido nos últimos cinco anos en canto número de solicitudes de patente ou extensión internacionais foi posible grazas ao aumento dos recursos dedicados pola USC, tanto financeiros como humanos, que mostran o compromiso da nosa institución coa protección do coñecemento xerado”, destacou Villaverde.
O socio director de ABG IP e Axente de Patentes Europeas, Juan Arias, apoiou esta afirmación e sinalou que “os datos de solicitudes de patente europea publicados recentemente elevan de 66 a 77 o número de solicitudes presentados por galegos. É boa nova; pero hai que salientar que se ben hai tecido empresarial que está apostando pola innovación, son as institucións públicas quen están tirando do carro da I+D rexional”. Neste senso, José Luis Villaverde especifica que do total a USC xestionou o 30% de todas as tramitadas dende Galicia.
Desde laboratorios galegos ao mundo
Nesta quinta edición, a xornada contou coa participación da directora da Área de Talento e Transferencia da Axencia Galega de Innovación (GAIN), María José Mariño, quen falou do programa Ignicia Transferencia de Coñecemento. “A Xunta apoiou 32 proxectos, dos que 17 están en desenvolvemento e 13 xa chegaron ao mercado en forma de spin-off ou acordos de licencia coa industria”, explicou.
Mostra disto é Celtarys Reserach, unha spin-off da Universidade de Santiago que entrou a formar parte do programa Ignicia en 2018 e cuxo co fundador, Eddy Sotelo, participou na mesa redonda moderada por María José Mariño xunto con Francisco Otero, catedrático e inventor en oito patentes concedidas e tres en solicitude.
Intelixencia Artificial en Galicia
Na xornada púxose tamén o foco na protección de invencións en intelixencia artificial, unha área na que Galicia destaca por ser a primeira comunidade en España e a primeira rexión europea en regulala por lei.
O especialista de ABG IP Pablo Calvo apuntou que “esta tecnoloxía que se enmarca no ámbito das invencións implementadas por ordenador, en 2024 bateu o récord de solicitudes de patente europea presentadas a nivel global, o que demostra que, a pesar das limitacións á hora de protexer os desenvolvementos en intelixencia artificial, existen vías que impiden a apropiación por parte de terceiros non autorizados”.
