Santiago de Compostela, 2 de abril de 2025
O conselleiro do Mar, Alfonso Villares, participou este mércores na reunión da Comisión Mar-Industria, celebrada con motivo da viaxe a Galicia do ministro do Mar de Cabo Verde, Jorge Mauricio dos Santos, e que serviu para consolidar as relacións empresariais de ambas as dúas rexións vencelladas ao sector marítimo-pesqueiro. E é que, tal e como subliñou o responsable autonómico, o país africano dispón dunha posición estratéxica, ao situarse preto dos caladoiros de Senegal e Mauritania e a medio camiño entre España e as illas Malvinas, Arxentina e Namibia. Pola súa banda, Galicia é a principal rexión europea en produtos do mar.
En 2024, as exportacións a Cabo Verde superaron as 2.900 toneladas, obtendo un valor mercantil de 9 millóns euros. Polo que respecta ás importacións, estas cífranse en máis de 3.800 toneladas e en 16,6 millóns de euros. Destaca o peixe conxelado, que supón o 76% de todas as exportacións galegas de produtos pesqueiros ao país africano. A Consellería tamén impulsa a Feira Expomar en dita rexión, co fin de impulsar a internacionalización da cadea mar-industria da comunidade. A xuntanza de hoxe, dá continuidade á rolda de contactos que o dirixente africano está a levar a cabo esta semana en Galicia. No día de onte, visitou o Instituto Galego de Formación en Acuicultura (IGAFA) e mañá entrevistarase cos responsables da empresa Jealsa; encontro no que tamén participará o conselleiro do Mar.