Ferrol, 13 de marzo de 2025
A directora xeral de Traballo Autónomo e Economía Social, Marta Mariño, acompañada pola delegada territorial da Xunta en Ferrol, Martina Aneiros, participou esta mañá na entrega de premios da undécima edición do certame Emprende Xove-Minimarket, organizado pola Asociación de Jóvenes Empresarios (AJE) de Ferrolterra. Este evento ten como obxectivo promover o espírito emprendedor entre a mocidade e premiar a innovación dos proxectos presentados. Nesta edición, 12 centros educativos e a Universidade da Coruña (UDC) tiveron a oportunidade de presentar aos máis de 300 asistentes os seus proxectos de emprendemento e optar aos galardóns ofertados nas diferentes categorías.
Marta Mariño, destacou a contribución deste certame ao reforzo do emprendemento entre o alumnado galego. Neste senso, remarcou o compromiso do Executivo galego co talento mozo —ao abeiro do que este ano se lanzará a Estratexia Mocidade Activa, que contará cun orzamento de 20 M€ só por parte da Consellería de Emprego, Comercio e Emigración—. En paralelo, lembrou que a Xunta pon a disposición das persoas emprendedoras a Rede de polos de emprendemento que desde a súa creación no ano 2022, xa leva atendidos no conxunto das 15 oficinas repartidas por toda Galicia máis de 3.500 proxectos, asesorando de forma totalmente gratuita e personalizada a novos emprendedores, como a aqueles que xa o fixeron e queren consolidarse. Concretamente, o polo de Ferrol leva preto de 600 proxectos atendidos, destacando que máis do 60% dos asesorados son mulleres.