A proxeria centrará o Día Mundial das Enfermidades Raras no CiMUS da USC, que este venres 28 reunirá referentes mundiais neste campo como Scott D. Berns e Leslie B. Gordon, co fundadores da Progeria Research Foundation (USA), organización pioneira na investigación e desenvolvemento de tratamentos para a proxeria no eido internacional, e coa participación de Esther Martínez Gracia, co fundadora da Asociación Progeria en España, cuxa labor é clave no apoio ás familias e na visibilidade da proxeria en España.
O evento organízao o investigador principal do CiMUS, Ricardo Villa Bellosta, para quen as testemuñas das persoas relatoras permitirán “pór en valor a importancia da investigación, a solidariedade e o compromiso na loita contra as enfermidades raras”. O CiMUS quere así achegar á sociedade esta enfermidade pouco común que afecta a nenos e nenas en todo o mundo acelerando o seu envellecemento de maneira prematura, para concienciar sobre a importancia da investigación para mellorar a calidade de vida de quen padecen enfermidades raras.
Quen desexe asistir, pode confirmar a súa participación.