Santiago de Compostela, 10 de febreiro de 2025
O director de Turismo de Galicia, Xosé Merelles, mantivo un encontro co alcalde do Concello de Tui, Enrique Cabaleiro, con quen abordou a importancia turística que terá a celebración, o vindeiro ano, do 800 aniversario da Catedral de Tui. Xosé Merelles amosou o interese do seu departamento por apoiar esta efeméride que pretende ademais a declaración por parte do Goberno central de Acontecemento de Excepcional Interese Público.
Ao mesmo tempo, o director de Turismo de Galicia e o rexedor de Tui fixeron un repaso por distintas actuacións que se están a realizar no Concello e que se traducirán na posta en valor de novos recursos turísticos e tamén polo incremento de peregrinos que rexistrou o Camiño Portugués percorrido en 2024 por un total de 95.953 persoas.