Santiago de Compostela
O Grupo de investigación Síncrisis-Investigación en Formas Culturais e o Instituto de Humanidades da Universidade de Santiago de Compostela (iHUs) organizan os días 17 e 18 de xuño o encontro ‘Epigrafía dixital: conservar, investigar e difundir’, que se desenvolverá na Facultade de Xeografía e Historia.
O programa estrutúrase en tres sesións. A primeira delas, sobre os desafíos da epigrafía dixital, contará coa participación de Manuel Ramírez Sánchez (ULPGC) e Marietta Horster (Univ. Mainz), e na segunda sobre as bases de datos dixitais intervirán David Espinosa (UCM) e Jonathan Edmondson (YorkU).
A terceira sesión, na mañá do día 18, versará sobre tecnoloxías aplicadas e correrá a cargo de Pieter Houten (Univ. Nottingham), Xabier Eguilleor (USAL) e Santiago Sánchez de la Parra (USC). O encontro rematará cunha mesa redonda a modos de conclusións sobre o futuro da epigrafía dixital.
O rexistro a esta actividade é gratuíto, e aquelas persoas que asistan á maioría das sesións recibirán un recoñecemento de 10 horas por parte da Comisión Académica do Programa de Doutoramento en Historia, Xeografía e Historia da Arte.