Vimianzo (A Coruña), 12 de maio de 2025
A directora xeral de Traballo Autónomo e Economía Social, Marta Mariño, participou esta tarde na xornada Emprender, Conectar e Co-crear no turismo da Costa da Morte, organizada polo Polo de emprendemento e apoio ao emprego de Coristanco. Con esta actividade, búscase que os asistentes coñezan modelos de negocio innovadores na Costa da Morte, como resposta ás necesidades de emprendemento do tecido empresarial, explorando as oportunidades que oferta o territorio, intercambiando experiencias ao mesmo tempo que se ofrece a posibilidade de formar sinerxías con emprendedores xa reafirmados e así fortalecer as estratexias de negocio.
A través desta iniciativa búscase consolidar e reforzar a Rede de polos de emprendemento e apoio ao emprego —iniciativa pública nada en xullo de 2022— que presta, de forma gratuíta e a través das súas 15 oficinas, asesoramento individualizado, tanto a quen desexa emprender na Comunidade como a quen xa o fixo e quere consolidarse. A Rede ten, ademais, un gran foco no rural, co obxectivo de dinamizar a economía local, fixar poboación e combater o reto demográfico. Neste marco, o Polo de Coristanco, desde a súa creación no ano 2022, leva preto de 310 proxectos atendidos e máis de 150 actividades realizadas entre reunións con entidades, accións de formación e eventos da rede, resaltando que actualmente o número de mulleres emprendedoras atópase no 51 % do total dos asesorados.