Lugo

A presión das actividades humanas sobre os recursos naturais non deixa de aumentar globalmente, impulsando cambios ambientais e a competencia pola terra entre diferentes usos, moitas veces conflitivos. Ante esta situación, o Instituto de Biodiversidade Agraria e Desenvolvemento Rural (IBADER) da USC pretende poñer en valor a necesidade dun “medio de negociación entre as diferentes visións e intereses sociais sobre o territorio”. Neste senso, deféndese a planificación participativa como o enfoque necesario para abordar a negociación dende as perspectivas de todas aquelas persoas involucradas na xestión territorial, para quen “a adaptación ao cambio climático é un reto prioritario e transversal”, destacan.

Coa intención de obter a capacitación para o deseño e desenvolvemento de procesos participativos en planificación, así como na súa xestión e dinamización en casos de adaptación ao cambio climático en sistemas agrarios, o IBADER do Campus Terra da USC acollerá do 2 ao 4 de abril, a acción formativa ‘Planeamento participativo para adaptación territorial ao cambio climático’. André Vizinho, doutor en planificación participativa para a adaptación da agricultura e a silvicultura ás alteracións climáticas, será o encargado de profundar nesta ferramenta. A inscrición pode formalizarse, ata o 15 de marzo, a través dun formulario electrónico. O curso diríxese tanto a persoal investigador, como a estudantado e persoas interesadas neste eido temático. 

Tres bloques 

A actividade impulsada en colaboración co LaboraTe da USC estruturase en tres bloques temáticos. Por unha banda, tratarase o deseño e desenvolvemento de procesos de planificación territorial participativa; mentres que a segunda parte da acción centrarase na xestión e dinamización de procesos participativos. Finalmente, haberá oco para o planeamento participativo en adaptación ás alteracións climáticas. 

André Vizinho ten experiencia en facilitación e desenvolvemento de métodos participativos para a planificación da adaptación ás alteracións climáticas, e actualmente traballa como consultor, facilitador e coordinador de proxectos de planificación e implementación de paisaxes rexenerativas.